Daar is altyd iets om in te vul

BlokBrein

Estelle Kruger het by Noordwes-Universiteit haar Hons BA (Psigologie) en Hons BA (Afrikaans-Nederlands) behaal. By Unisa voltooi sy haar studie vir haar Nagraadse Onderwysdiploma en by UKZN behaal sy ’n MA (cum laude) vir die onderrig van Afrikaans as addisionele taal. Ook verwerf sy by die Universiteit Stellenbosch ’n PhD oor die onderrig van Afrikaans. Hier het sy vir 10 jaar Afrikaans-onderrig aan onderwysstudente in die Fakulteit Opvoedkunde doseer. Estelle ontvang in 2006 die rektor en visekanselier se toekenning vir voortreflike onderrig.

Estelle was vir sewe jaar die redakteur van LitNet Akademies (Opvoedkunde). Tans leef sy haar passie uit in die baie wonings van LitNet, waar sy resensies oor nuwe Afrikaanse jeugromans skryf, nou en dan ’n gedig of twee skryf, en e-gesprekke met skrywers voer.

In 2023 is haar metaroman, kammawaarwêreld, en in 2025 haar versebundel, Skemerverse, deur Naledi gepubliseer.

Estelle het die liefde vir blokkiesraaisels in 2020 ontdek, en het sedertdien saam met Izak Furstenberg van Blokaspaai gewerk as mede-opsteller vir IdeesFabriek se tydskrif, Joernaal.

Xword

Anina Roux is 'n vryskutjoernalis en woon in Johannesburg. Sy het byna 40 jaar se ondervinding in die saamstel van verskillende soorte blokkiesraaisels, blokraaisels en woordspeletjies, in beide Afrikaans en Engels, sowel as verskeie tipes Sudoku's.

Anina se naam het oor die jare sinoniem geword met professionaliteit en met pasgemaakte raaisels wat betyds aan publikasies gelewer word. Die groeiende aanvraag na haar kreatiewe werk het tot gevolg gehad dat sy die besigheid moes uitbrei. So is die familiesaak XWord gebore. Vandag bestaan XWord uit sewe mense wat verskeie raaisels en woordspeletjies vir uiteenlopende publikasies en klante in Suid-Afrika en selfs in die buiteland saamstel en redigeer.

In samewerking met haar spanlede Louise van Tonder, Albé Grobbelaar, Samantha McKendrick en Rick van Tonder is vier boeke tussen 2007 en 2009 deur XWord uitgegee, nl. Groot Afrikaanse Pretboek, Bybelblokraaiboek, Grootdruk-blokraaiboek en die Finweek Blokkiesraaiselboek.

Penpret

Penpret word besit en bestuur deur twee dames, Yvonne van Eeden en haar dogter Heidri van Eeden en ‘n paar medewerkers. Yvonne het bykans veertig jaar gelede die bedryf begin as die heel eerste persoon om ‘n Afrikaanse Blokraaisel in Suid-Afrika op te stel.

Huisgenoot, vir wie sy tans nog werk, was die heel eerste tydskrif om haar werk te publiseer. Sy het met groot sukses die kuns om blokraaisels op te stel bemeester en werk vandag vir verskeie tydskrifte en koerante.

Uit haar pen het reeds verskeie Blokraaiselboeke verskyn, asook ’n Blokraaiwoordeboek, wat sy in medewerking met haar suster saamgestel het.

Sewe jaar gelede het Heidri by haar aangesluit. Hulle vorm ‘n gedugte span vir wie blokraaisels-opstel ‘n groot uitdaging en passie is.